ఏపీ ముఖ్యమంత్రి నారా చంద్రబాబు నాయుడు శుక్రవారం బీసీ సంక్షేమ శాఖపై సమీక్ష నిర్వహించారు. ఈ సందర్భంగా బీసీ సంక్షేమ హాస్టళ్ల నిర్వహణ, విద్యార్థులకు అందుతున్న సౌకర్యాలపై చంద్రబాబు ఆరా తీశారు. అలాగే విద్యార్థులకు డైట్ బకాయిలు వెంటనే చెల్లించాలని అధికారులను ఆదేశించారు. నసనకోట, ఆత్మకూరులోని బీసీ బాలికల పాఠశాలలను రెసిడెన్షియల్ కాలేజీలుగా అప్ గ్రేడ్ చేయాలని చంద్రబాబు అధికారులను ఆదేశించారు. మంత్రివర్గ ఉప సంఘం నుంచి నివేదిక రాగానే బీసీ రక్షణ చట్టం రూపకల్పనపై చర్యలు తీసుకుంటామని తెలిపారు.
మరోవైపు స్వచ్చాంధ్ర, స్వచ్ఛ్ దివాస్‌పైనా చంద్రబాబు సమీక్ష సమావేశం నిర్వహించారు. ఈ సందర్భంగా రాష్ట్రంలోని వనరుల సద్వినియోగం, వాటిని ఉపయోగించి అభివృద్ధి ఎలా సాధించాలనే దానిపై దృష్టి పెట్టాలని సూచించారు. ప్రజల జీవన ప్రమాణాలు పెంచడంతో పాటుగా పర్యాటక రంగానికి ప్రోత్సాహంపై చంద్రబాబు అధికారులతో చర్చించారు. ఘనవ్యర్ధాల నిర్వహణ, ప్రజారోగ్యం, పారిశుద్ధ్యానికి ప్రాధాన్యత లక్ష్యాలకు అనుగుణంగా పనిచేయాలని చంద్రబాబు అధికారులను ఆదేశించారు. మరోవైపు బీసీ సంక్షేమ శాఖపై సమీక్షా సమావేశంలో చంద్రబాబు కీలక వ్యాఖ్యలు చేశారు. వైసీపీ ప్రభుత్వం హయాంలో బీసీలను ఊచకోత కోశారంటూ చంద్రబాబు సంచలన వ్యాఖ్యలు చేశారు. ఈ అంశంపై సమగ్ర విచారణ జరిపి.. నిందితులను కఠినంగా శిక్షించాల్సి అవసరం ఉందని చంద్రబాబు అభిప్రాయపడ్డారు.
మరోవైపు మంగళగిరిలోని పార్టీ కార్యాలయంలో చంద్రబాబు శుక్రవారం సమీక్షా సమావేశం నిర్వహించారు. అందుబాటులో ఉన్న నేతలతో సమీక్ష జరిపిన చంద్రబాబు ఎమ్మెల్సీ ఎన్నికలు, కార్యకర్తల సంక్షేమం గురించి వారితో చర్చించారు. ఉత్తరాంధ్ర ఉపాధ్యాయ ఎమ్మెల్సీ ఎన్నికల్లో మద్దతు ఎవరికి ఇవ్వాలనే దానిపై త్రిసభ్య కమిటీ ఏర్పాటు చేయాలని నిర్ణయించారు. ఈ కమిటీలో ఎంపీ భరత్, ఎమ్మెల్సీ వేపాడ చిరంజీవి, ఏఎస్ రామకృష్ణ సభ్యులుగా ఉండనున్నారు. అలాగే ఉమ్మడి ఉభయగోదావరి, కృష్ణా-గుంటూరు జిల్లాల గ్రాడ్యుయేట్ ఎమ్మెల్సీ ఎన్నికల్లో విజయం సాధించాలన్న చంద్రబాబు.. కూటమి నేతలు ఈ విషయాన్ని సీరియస్‌గా తీసుకుని పనిచేయాలని స్పష్టం చేశారు. ఆలపాటి రాజా, పేరాబత్తుల రాజశేఖర్‌లను భారీ మెజారిటీతో గెలిపించాలని.. ఆ రకంగా పనిచేయాలని ఆదేశించారు.
