పేరులో విష్ణువుని పెట్టుకున్న మంచు విష్ణు శివ భక్తుడిగా మారి.. ‘కన్నప్ప’ సినిమాతో ప్రేక్షకుల ముందుకి రాబోతున్నారు. అయితే ఈ సినిమాలో ప్రభాస్.. రుద్రగా కీలకపాత్రలో కనిపిస్తుండగా.. ఇటీవల ఆయన పాత్రకి సంబంధించిన ఫస్ట్ లుక్‌ను రిలీజ్ చేశారు. దాంతో పాటు.. ఇటీవల రిలీజ్ అయిన ‘శివ శివ శంకర’ పాటకు అనూహ్యమైన స్పందన లభించింది. నిజానికి మంచు విష్ణు అనే కాదు.. ఆ ఫ్యామిలీ వాళ్లు ఏ సినిమాలో నటించినా.. వాళ్లేం మాట్లాడినా.. ట్రోల్ చేయడానికి ఓ బ్యాచ్ రెడీగా ఉంటుంది. అయితే అలాంటి ట్రోలింగ్ బ్యాచ్‌తో సైతం వహ్ వా అనిపించాడంటే.. ‘కన్నప్ప’ సినిమాతో మంచు విష్ణు హిట్ కొట్టి గట్టెక్కేట్టుగానే కనిపిస్తున్నాడు.
పైగా ఈ సినిమాలో ప్రభాస్.. కీలకపాత్రలో కనిపిస్తుండటంతో పాజిటివ్ బజ్ ఏర్పడింది. అయితే చాలామంది డౌటానుమానం ఏంటంటే.. అసలు ప్రభాస్ మంచు ఫ్యామిలీ సినిమాలో ఎందుకు నటిస్తున్నాడూ.. అసలు ఏం చెప్పి ప్రభాస్‌ని ఒప్పించావయ్యా మంచు విష్ణూ అంటే.. ఆ ప్రశ్నకి సమాధానం చెప్పే టైం ఆసన్నమైందని అంటున్నారు మంచు విష్ణు.
తాజా ఇంటర్వ్యూలో ‘కన్నప్ప’ సినిమా గురించి.. అందులోని ప్రభాస్ రోల్ గురించి మాట్లాడుతూ.. ‘కన్నప్ప సినిమా తరువాత నన్ను కన్నప్పగానే గుర్తిస్తారు. ఇది నా అరంగేట్రం అని అనుకోవచ్చు. ఇప్పటి వరకూ చేసిన సినిమాలన్నీ ఓ లెక్క.. కన్నప్ప మరోలెక్క. ఎన్నో ఏళ్లుగా ఈ సినిమా కోసం వర్క్ చేశాం. ఆ శివుడి అనుగ్రహంతో ఈ సినిమా మీ ముందుకు వస్తుంది. ఖచ్చితంగా అందరికీ నచ్చుతుంది.
ఎంతో రీసెర్చ్ చేసి ఈ సినిమా చేశా. కన్నప్ప కోసం కొంత తెలుసు.. రీసెర్చ్‌లో ఆయన గురించి చాలా విషయాలు తెలుసుకున్నా. నేను ఒక హిందువుగా ఉన్నందుకు గర్విస్తున్నా. లార్డ్ శివగా.. అక్షయ్ కుమార్‌గారైతే పర్ఫెక్ట్‌గా సూట్ అవుతారని అనుకున్నా. ఆయన పాత్ర హైలైట్ అవుతుంది. చాలా ప్రొఫెషనల్‌గా ఉంటారు. ఇక ప్రభాస్ గారి గురించి ఒక్కమాటలో చెప్పాలంటే.. ఆయనో అద్భుతం. ఆయనకి ఉన్న స్వాగ్.. వెరీ వెరీ కూల్ స్వాగ్.
ప్రభాస్ గారిని ఎలా ఒప్పించారని చాలామంది అడుగుతున్నారు. ప్రభాస్ గారు కన్నప్ప చేయడానికి మెయిన్ రీజ్ నాన్నగారు. ఆయనపై ఉన్న ప్రేమ, గౌరవంతోనే ఈ సినిమా చేస్తున్నారు. లేదంటే ఆయనకి చేయాల్సిన అవసరం లేదు. ప్రభాస్ నటించినందుకు.. సగం బడ్జెట్ ఆయనకే ఇచ్చాం అని అంటున్నారు. అది చాలా తప్పు. ఆయన ఏం తీసుకున్నారు? ఈ పాత్రకి ఎందుకు ఒప్పుకున్నారో చెప్పాల్సిన టైంలో చెప్తాను. స్టేజ్‌పైనే అందరి ముందు చెప్తాను.
బడ్జెట్ గురించి గుండెల్లో రైళ్లు..
ఈ సినిమాకి ఇంత బడ్జెట్ పెట్టేశాం అని అప్పటికీ గుండెల్లో రైళ్లు పరుగుపెడుతున్నాయి. కానీ సక్సెస్, ఫెయిల్యూర్ రెండింటీ సమానంగా చూడాలి. సక్సెస్ అనేది శాశ్వతం కాదు.. ఫెయిల్యూర్ అనేది శాశ్వతం కాదు. కానీ ఈ ఇద్దరూ మోసగాళ్లే. ఈ ఇద్దరూ పర్మినెంట్‌గా ఉండరు. సక్సెస్ వచ్చిందని విర్రవీగకూడదు. ఫెయిల్యూర్ వచ్చిందని కుంగిపోకూడదు.. ఏది వచ్చినా ధీటుగా ఎదుర్కొవాల్సిందే అదే జీవితం’ అంటూ చెప్పుకొచ్చారు మంచు విష్ణు.
